Өзгөндө курал-жарак саткан дүкөндөр текшерилди

Өзгөн районунда курал колдонууга уруксат алган мекемелер, мергенчилер, курал саткан дүкөндөр текшерилгенин Ош облустук милициясынын басма сөз кызматы кабарлады.

Райондук милиция мергенчи катары каттоодо турган 236 адамдын, 1 дүкөндүн, 2 күзөт мекемесинин, 2 өндүрүштүк жардыргыч заттарды сактаган кампанын документтерин карап чыгып, курал сактоо шарттары менен таанышкан.

Натыйжада курал сактоо жана кайра каттатуу эрежелерин бузган 6 адамга Укук бузуулар кодексинин 133-134-беренелери менен протокол түзүлүп, 12 миң сом айып салынган.

Аны менен катар сактоо шарттарын бузган 2 адамдын куралын милиция кызматкерлери «маселе чечилгенге чейин» деген шарт менен бөлүмгө алып кетишкен.

Курал-жаракты мыйзамсыз саткан, сактаган жарандар Кылмыш-жаза кодексинин 267-268-беренелеринин негизинде жоопко тартылат. Куралын ички иштер органдарына өз ыктыяры менен өткөрүп бергендер бул жазадан бошотулат.