Чыңгыз Айтматов атындагы жаштар сыйлыгына сынак жарыяланды

Маданият, маалымат, спорт жана жаштар саясаты министрлиги Чыңгыз Айтматов атындагы мамлекеттик жаштар сыйлыгына сынак жарыяланганын кабарлады.

Сыйлык төмөнкү 11 номинация боюнча тапшырылат:

1.Адабият жаатындагы мыкты чыгарма;

2.Журналистика жана телекөрсөтүү жаатындагы мыкты чыгарма;

3.Музыкалык искусство жаатындагы мыкты чыгарма жана мыкты аткаруучу;

4.Көркөм искусство (живопись, скульптура, графика, декоративдик-колдонмо жана монументтик искусство) жаатындагы мыкты чыгарма;

5.Шаар курулушу, архитектура жана дизайн жаатындагы мыкты долбоор;

6.Театр жана цирк искусствосунун мыкты чыгармасы;

7.Кино жаатындагы (сценарийлик, композитордук, режиссёрлук, операторлук, актёрлук) мыкты жетишкендик;

8.Илим жана жаңы технологиялар жаатындагы мыкты иш;

9.Экономика, бизнес, меценаттык жаатындагы мыкты жетишкендик;

10.Спорт жаатындагы мыкты жетишкендик;

11.Жаштар саясатын өнүктүрүүгө кошкон өзгөчө салымы үчүн.

Сынакка катышууну каалаган жаштар төмөнкү документтерди тапшырууга тийиш:

1.сунуш кат

2.чыгармачыл жаматтардын сунуштоо чогулушунун протоколу

3.чыгармачыл мүнөздөмөсү

4.буга чейин алган сыйлыктарынын көчүрмөлөрү

5.көрсөтүлгөн иши тууралуу кыска (эки беттен ашпаган) аннотация (адабият жаатында: китептери)

6.кыскача өмүр баяны

7.4×6 өлчөмүндө 2 фотосүрөт

8.паспортунун көчүрмөсү

Сыйлыкка 35 жашка чейинки чыгармачыл адамдар катыша алат. Документтер ушул жылдын 10-августуна чейин Бишкек шаарындагы Пушкин көчөсү, 78 (Маданият министрлигинин имараты, Жаштар саясаты башкармалыгынын иш бөлмөсү) дарегинде кабыл алынат. Кошумча маалыматты 0(312) 66-09-52, 62-11-94 телефон номерлеринен алууга болот.

Атайын комиссиянын тандоосунан өткөн чыгармачыл жаштарга лауреаттык диплом, төш белги, 100 миң сом акчалай сыйлык тапшырылат.

Айта кетсек, Чыңгыз Айтматов атындагы жаштар сыйлыгы 2000-жылы негизделген. Сыйлыкка тандап алуу жобосуна 2016-жылы Өкмөттүн №632 токтому менен бир катар өзгөртүүлөр, толуктоолор киргизилген.