Индиялык студентти тоногондор кармалды

Каракчылыкка шектүүлөр кармалганын 28-октябрда Ленин райондук ички иштер бөлүмүнүн басма сөз кызматы билдирди.

Каракчылардын курмандыгы Москва көчөсүндөгү батирди ижарага алган Индиянын жараны болгон. 19-октябрда кечки саат сегиздер чамасында анын үйүнө кылмышкерлер киришкен. Алар бычак менен коркутуп, 3000 доллар, 7000 сом, 4 уюлдук телефон («Айфон 10X», «Редми Нот 8», «Редми Нот 9» жана башка уюлдук телефон), ноутбук, «Айпад», «Айрподс» кулакчын, кышкы күрмө, 3 саат («Титан»), футболка жана 2 жуп бут кийимин алып, чет өлкөлүк жаранды байлап, өздөрү качып кетишкен.

Аталган факт Жазык кодексинин 202-беренеси («Каракчылык») менен Кылмыштардын жана жоруктардын бирдиктүү реестрине катталды.

Ленин РИИБдин жана Бишкек ШИИБдин ыкчам кызматкерлери тарабынан кылмышка шектелип 1987-жылы туулган М.М., 1997-жылы туулган Б.Б., 1997-жылы туулган С.Д. жана 2004-жылы туулган О.Н. аттуу жарандар кармалды. Алар убактылуу кармоочу жайга киргизилип, кийинчерээк соттун чечими менен 2004-жылы туулган Н.О.дон башкасы эки айга СИЗО-1 абагына камалды. Н.О. ата-энесине өткөрүлүп берилген.

Милиция шектүүлөрдүн башка ушул сыяктуу кылмыштарга катыштыгы бар же жок экенин аныктайт. Учурда тергөө иштери жүрүп жатат.