• Башкы бет
  • Казакстан: аккредитациядан өтпөгөн журналисттердин ишине тыюу салуу сунушталууда
13:51, -ж., 29-январь

Казакстан: аккредитациядан өтпөгөн журналисттердин ишине тыюу салуу сунушталууда

Казакстан: аккредитациядан өтпөгөн  журналисттердин ишине тыюу салуу сунушталууда

Казакстан өкмөтүнүн масс-медиа жөнүндө жаңы мыйзам долбооруна ылайык, чет элдик жалпыга маалымдоо каражаттарын жана алардын журналисттерин аккредитациялоо эрежелерине өзгөртүүлөр киргизилүүдө.

Депутаттар сунуштаган өзгөртүүлөр Тышкы иштер министрлигине "Казакстандын улуттук коопсуздугуна коркунуч жаралган учурда" чет элдик жалпыга маалымдоо каражаттарынын өкүлдөрү менен журналисттерине аккредитация бербөө укугун берет.

Сунушталып жаткан өзгөртүүлөр чет элдик маалымат каражаттарына жана чет элдик журналисттерге аккредитациясы жок журналисттик ишмердүүлүк менен алектенүүгө тыюу салууну да карайт.

Мындан тышкары чет элдик маалымат каражаттарынын ишмердүүлүгүн соттун чечимисиз токтотуу учурун киргизүү сунушталууда.

"Колдонуудагы мыйзамдардын нормалары бузулган учурда чет өлкөлүк жалпыга маалымдоо каражаттарынын ишмердүүлүгүн токтотуу Казакстандын Тышкы иштер министрлиги аныктаган тартипте жүргүзүлөт", - деп түшүндүрүлгөн долбоордо.

25-январда жумушчу топтун мүчөлөрү тиешелүү өзгөртүүлөрдү көпчүлүк добуш менен колдоп беришти.

Бүгүнкү күнгө карата Казакстандын Тышкы иштер министрлиги "Азаттык" радиосунун казак кызматынын 36 кабарчысына аккредитация берген жок же жаңырта элек. Алардын арасында 2022-жылдан бери аккредитациясы узартыла элек журналисттер да бар. Учурдагы мыйзамдарга ылайык, Тышкы иштер министрлиги арызды алгандан кийин эки айдын ичинде чет элдик ЖМКнын кабарчысына аккредитация берүү же баш тартуу маселесин чечиши керек. Эгерде кабарчыга аккредитация берүүдөн баш тартса, себебин түшүндүрүүгө тийиш.

Эгерде сиз катаны байкасаңыз, керектүү текстти бөлүп белгилеңиз жана бул тууралуу редакцияга билдирүү үчүн Ctrl+Enter басыңыз
#Казакстан-ЖМК

Комментарийлер

live comments feed...