Садыр Жапаров иш сапары менен Өзбекстанга барат

Президент Садыр Жапаров Өзбекстанга иш сапар менен барат. Бул тууралуу Президенттин администрациясынын маалыматтык саясат бөлүмү билдирди.

8-9-ноябрда Ташкентте Экономикалык Кызматташтык Уюмуна (ЭКУ) мүчө мамлекеттердин башчыларынын 16-саммити өтөт. Иш-чарага Азербайжандын, Ирандын, Кыргызстандын, Тажикстандын, Түркмөнстандын, Түркиянын, Өзбекстандын Президенттери, Казакстандын, Пакистандын премьер-министрлери катышат.

Отурумда Уюмдун күн тартибиндеги актуалдуу маселелер, ошондой эле Уюмга мүчө мамлекеттердин ич ара экономикалык, коомдук-маданий, илимий-техникалык кызматташтыгы, бири-бирине жардамдашуу аркылуу дүйнөлүк кырдаалга таасир этүү жолдору талкууланат.

Саммиттин алкагында «Борбор Азиядагы климаттын өзгөрүшү: Балдардын жана жаштардын аракети» темасында эл аралык форум да өтүп, ага мамлекет башчынын жубайы Айгүл Жапарова да катышат.