УКМК 2 гектарга жакын жерди мэриянын балансына кайтарды

УКМК Жалал-Абад шаарында өндүрүш жана соода жайлары, 430 миллион сом өлчөмүндөгү жер тилкелери, имараттар жана курулуштар мамлекеттин менчигине кайтарылганын маалымдады.

Атайын кызматтын билдиришинче, аталган иш боюнча соттолгондор 2000-жылы ар кандай коррупциялык схемаларды жана махинацияларды колдонуп, мурда мамлекеттин балансында турган кыймылсыз мүлктөрдү мыйзамсыз ээлешкен.

Тергөөнүн жүрүшүндө алардын 2010-жылдын май, июнь айларында Жалал-Абад шаарында административдик имараттарды күч менен басып алууну жана улуттар аралык кагылышууну уюштурууга катыштыгы бар экендиги аныкталган.

Азыркы учурда мамлекетке өткөн жалпы аянты 2 гектарга жакын жер тилкелерге Жалал-Абад мэриясы социалдык объектилерди (бала бакча, мектеп ж.б.) курууну пландоодо. Мындан тышкары мамлекеттик жана муниципалдык кызматкерлер үчүн арзан турак-жай, анын ичинде мамлекеттик ипотекалык үйлөр курулмакчы.

Жалал-Абад мэриясынын маалыматы боюнча, мамлекетке кайтарылган мүлктөр калаанын Ленин жана Курманбек көчөлөрүндө жайгашкан.