Июнь окуясында милиция кызматерин өлтүрүүгө шектелгендер кармалды

ИИМ кызматкерин өлтүрүүгө шектелип Сузак районунун эки тургуну кармалды. Бул тууралуу атайын кызмат кабарлады.

Маалыматка ылайык, алар ушул жылдын 27-майында кармалган.

«Алар 2010-жылдын июнь айында Жалал-Абад облусунда болгон массалык баш аламандыкка активдүү катышкан. Ошондой эле милициянын подполковнигин өлтүрүүгө катышкандыгы аныкталды. Бирок 2010-2011-жылдары тергөө учурунда алардын өздүгү аныкталбай калган», — деп айтылат билдирүүдө.

Кайра козголгон кылмыш ишинин алкагында кармалгандар тергөө абагына киргизилген.

Ошондой эле, УКМК 2010-жылдын июнь окуяларынын уюштуруучуларын жана активдүү катышуучуларын аныктоо жана жоопкерчиликке тартуу боюнча иш-чаралар жүргүзүлүп жатканын кошумчалаган. Ага байланыштуу өзгөчө оор кылмыш жасаган адамдарга карата эскирүү мөөнөтү колдонулбай турганын эскерткен.