• Башкы бет
  • Кытай-Кыргызстан-Өзбекстан темир жолунун документи апрелде даяр болот,-А. Жапаров
11:09, -ж., 22-ноябрь

Кытай-Кыргызстан-Өзбекстан темир жолунун документи апрелде даяр болот,-А. Жапаров

Кытай-Кыргызстан-Өзбекстан темир жолунун документи апрелде даяр болот,-А. Жапаров

Министрлер кабинетинин төрагасы Акылбек Жапаров 21-ноябрда Жогорку Кеңеште Кытай-Кыргызстан-Өзбекстан темир жол долбоорунун техникалык-экономикалык негиздемеси (ТЭО) тууралуу учкай маалымат берди.

Ал Бюджет, экономикалык жана фискалдык саясат комитетинин жыйынында Кытайдын Долборлоо институту бул документтерди эмдиги жылдын апрель айында толугу менен бүтүрүп берерин маалымдады.

Өткөн айда үч өлкө темир жол долбоорунун техникалык-экономикалык негиздемесин иштеп чыгууну каржылоогого байланыштуу макулдашканы маалым болгон. Парламентте «Кыргыз темир жолу» ишканасынын директору Азамат Сакиев биринчи этапта Кыргызстан жалпы сумманын 20% төгөрүн, экинчи этапта Кыргызстан 10, Өзбекстан 30% берерин, үчүнчү этапта Кытай 30% төлөрүн маалымдаган. Ошондой эле, төртүнчү этапта ар бир өлкөгө бирдей үлүш туура келерин билдирген. Азырынча негиздемени иштеп чыгууга канча каражат кетери белгисиз.

Расмий маалыматка ылайык, учурда “Кыргызтемиржолу” ишканасы менен Кытай темир жол курулуш корпорациясынын Долбоорлоо-изилдөө институтунун ортосундагы келишимдин негизинде Кыргызстанга 160 адис келип, Нарын жана Жалал-Абад облустарында жер-жерлерде изилдөө иштерин жүргүзүп жатат. Алар топографиялык изилдөөлөрдү жүргүзөт, кыртыштын үлгүсүн сынайт.

Өзбекстандын Самарканд шаарында 14-сентябрда Шанхай кызматташтык уюмунун (ШКУ) саммитинин алкагында Кытай-Кыргызстан-Өзбекстан темир жолунун долбоору боюнча кызматташууга кол коюлган. Макулдашууларга ылайык, жол тилкеси «Торугарт – Арпа – Макмал – Жалал-Абад» багыты менен өтөт. Бул жолдун узундугу 280 чакырымды түзөт. Буга чейин ички долбоордун болжолдуу баасы 5 млрд. долларга барабар экени кабарланган.

Эгерде сиз катаны байкасаңыз, керектүү текстти бөлүп белгилеңиз жана бул тууралуу редакцияга билдирүү үчүн Ctrl+Enter басыңыз
##Кытай-Кыргызстан-Өзбекстан темир жолу #Акылбек Жапаров

Комментарийлер

live comments feed...