• Башкы бет
  • Украинадагы жагдайга байланыштуу маселе Жогорку Кеңеште көтөрүлдү
13:59, -ж., 24-февраль

Украинадагы жагдайга байланыштуу маселе Жогорку Кеңеште көтөрүлдү

Украинадагы жагдайга байланыштуу маселе Жогорку Кеңеште көтөрүлдү

Жогорку Кеңештин 24-февралдагы жыйынында депутат Айбек Маткеримов Украинада жүргөн кыргызстандыктар Киевдеги элчилик менен байланыша албай жатканын, өлкөдөн чыгып кетүүгө жардам сураганын айтып чыкты. Эл өкүлү буга байланыштуу мекендештердин кайрылуулары көбөйгөнүн билдирип, Министрлер кабинетин жагдайга көңүл буруп, чара көрүүгө чакырды.

Өзүн Турдубек деп тааныштырган Киевдеги кыргызстандыктардын бири элчилик менен байланыша албай жатканын ырастады. Ал ушул тушта үй-бүлөсү менен шаардан чыгып кетүүгө аракет кылып жатканын, бирок машиналардын тыгынына туш болуп калганын айтып берди.

Кыргызстандын Киевдеги консулу Эрмек Каныбеков "Азаттыкка" комментарий берип жатып, бул өлкөдөгү ар бир кыргызстандык менен телефондон кабарлашып жатышканын Украинадагы соңку жагдай тууралуу маалымат берилгенин айтты.

Расмий маалыматка ылайык, Украинада жүргөн 680 кыргызстандык консулдук каттоодон өткөн. Бул өлкөдөгү кыргыз жарандарынын жалпы саны 1350дөн ашат. Соңку кырдаалдан улам сыртка убактылуу чыгып кеткендер дагы бар.

Украинанын президенти Владимир Зеленский 24-февралда өлкөгө аскердик режим киргизилгенин жарыялады. Ал Орусияны өлкөнүн аскердик жана чек арадагы объектилерине чабуул жасаганы үчүн айыптады.

"Мен Украинадагы бардык жарандарды үйлөрүндө болууга чакырам. Армия иштеп жатат. Биз иштеп жатабыз. Дүрбөлөңгө түшпөгүлө. Биз күчтүүбүз, биз баарына даярбыз. Биз жеңебиз. Украинага даңк!" - деди Зеленский.

Ушул тушта Украинанын борбору Киев баштаган шаарларда, Краматорск, Харьков, Донецк жана башка облустарда, жана чек арадагы аймактарда жардыруу, атышуу тууралуу маалыматтар тарап жатат.

Эгерде сиз катаны байкасаңыз, керектүү текстти бөлүп белгилеңиз жана бул тууралуу редакцияга билдирүү үчүн Ctrl+Enter басыңыз

Комментарийлер

live comments feed...