УКМКнын төрагасы Казакстандагы жаңжалдарга кыргыз жарандарын айыптабоого чакырды

Кыргызстандын жарандарын терроризмге айыптаган туура эмес, деп билдирди УКМКнын төрагасы Камчыбек Ташиев музыкант Викрам Рузахуновду колдоо митингинде.

Анын айтымында, Казакстан тергөө иштеринин риторикасын өзгөртүшү керек.

"Расмий түрдө биздин өлкөдө террорчулар жок экенин жана болушу мүмкүн эмес экенин билдирем. Эгерде террорчулар болуп калса, биз мыйзам чегинде чара көрөбүз. Казакстанда биздин жарандар кармалган болушу мүмкүн, бирок азыркыга чейин алар тууралуу расмий маалымат ала элекпиз", - деди Ташиев.

Ал маалымат келсе, тергөө жүргүзүлөрүн кошумчалады.

Бүгүн, 9-январда Казакстандын Кыргызстандагы элчилигинин алдында музыкант Викрам Рузахуновду колдоо митинги өтүүдө. Буга чейин музыкант Казакстандын күч органдары тарабынан кармалганы белгилүү болгон.

Чогулгандар Казакстандын бийлигинен кыргыз жарандарын ички ишине аралаштырбоону талап кылууда.