Казакстанда "Эл тиреги" партиясынын төрагасы кармалды

Казакстанда расмий түрдө катталбаган «Эл тиреги» партиясынын төрагасы Нуржан Алтаев жана анын орун басары — Тажик-афган ардагерлер союзунун башчысы Мурат Мухамеджанов укук коргоо органдары тарабынан кармалды.

«KazTAG» жалпыга маалымдоо каражаты билдиргендей, алар 15 суткага камакка алынды.

3-январда Казакстанда расмий түрдө катталбаган Демократиялык партия жана «Эл тиреги» партиясынын тарапташтары Алматы жана Нур-Султан шаарларында Мангистау облусундагы митингчилерди колдоп чыгышкан.

Нуржан Алтаев — «Нур Отан» партиясынын мурдагы мүчөсү. Соңку парламенттик шайлоодо депутаттыкка талапкерлердин тизмесине кирген эмес. Андан соң партия түзөрүн жар салган.