Ооганстандан 9 кыргыз жараны эвакуацияланды

Кыргызстандын Тышкы иштер министрлиги Ооганстандагы туруксуз абалдан улам тогуз кыргызстандык эвакуацияланганын маалымдады. Учурда башка жарандарды алып келүү боюнча иштеп жатканын кабарлады.

 «17-августта элчиликтин жардамы менен Кыргыз Республикасынын тогуз жараны эвакуацияланды. Калган жарандар коопсуз жайда. Учурда аларды Кабулдагы Кыргызстандын дипломатиялык мекемесинин имаратына алып келүү иштери жүрүп жатат», - деп айтылат билдирүүдө.

Мекеме Ооганстандагы памирлик кыргыздардын виза жана эвакуация жөнүндө кайрылуусу боюнча маалымат текшерилип жатканын кошумчалады.

АКШ баштаган эл аралык коалиция Ооганстандагы күчтөрүн 1-майдан тарта чыгарып кете баштаган. Талибдердин аракети ошондон тартып күчөп, анын аягы Кабулду алуу менен аяктады. Аскерлерди чыгарып кетүү жараяны 11-сентябрда аяктай турганы айтылган. Бирок кырдаалга байланыштуу ушул айда Ооганстандан толук чыгарылганы жатат.